Sunday, July 21
Shadow

सिमावर्ती जिल्ला बाँकेमा हतियार संकलनमा ठुलाे चुनाैती

बाँके – जिल्लामा लाइसेन्स लिएर हतियार राख्ने र नवीकरण गर्नेको सङ्ख्या ठुलै रहेको छ । तर, निर्वाचनका बेला ती हतियार प्रहरी इकाईमा जम्मा गर्नुपर्ने सूचना जारी गरेर जम्मा नगरे कारवाही हुने चेतावनी दिइए पनि निकै कमले मात्र जम्मा गर्ने गरेको पाइएको छ ।

गत वैशाखमा पनि स्थानीय तहको निर्वाचनका बेला १० भन्दा कम मात्र हतियार प्रहरी इकाईमा जम्मा गरिएका थिए । २०७४ सालमा भएको निर्वाचनमा समेत प्रशासनले पटक पटक सूचना जारी गर्दा पनि लाइसेन्स वाला हतियार प्रहरी इकाई मा निकै कम सङ्ख्यामा जम्मा गरिएको थियो ।

जिल्ला प्रशासन कार्यालय बाँकेको तथ्याङक अनुसार जिल्लामा ५५५ जनाले हतियार राख्न अनुमति लिएर एक हजार जति हतियार राखेका छन् । गत आर्थिक वर्ष २०७८-०७९ मा एउटा हतियार नामसारी भएको छ । उक्त अवधिमा १६९ वटा हतियार नवीकरण गरेको प्रशासनको तथ्याङक रहेको छ ।

प्रशासनले हातहतियार नवीकरणबाट मात्रै गत आर्थिक वर्षमा ५ लाख रुपियाँ राजश्व असुल गरेको छ । प्रशासनको तथ्याङक अनुसार बाँकेमा ३०० भरुवा बन्दुक र ५३४ वटा बाराबोर रहेको छ । जिल्लामा पेस्तोल सात वटा, बाराबोर एक नाले १७७, दुई नाले २४१, राइफल ८८, एअरगन ३, ३२ बोर ३ थान रहेको छ । जसमा सर्ट गन २ थान, १६ बोर राइफल ४ थान सहित बाँकेमा ८३४ वटा हतियार छन् । तर, निर्वाचनको बेला हतियार जम्मा गर्ने सूचना जारी गरिएकोमा हालसम्म कुनै पनि हतियार जम्मा गरिएको छैन ।

अनुमति लिएर राखिएका र भारतबाट भित्रिने अवैध हतियार तथा नेपालमै उत्पादित साना–घरेलु हतियार जिल्लाको सुरक्षाका लागि ठुलो चुनौती बन्दै गएको प्रहरीको भनाई छ । प्रहरीका अनुसार विभिन्न स्थानमा भएको आपराधिक क्रियाकलापमा साना हतियार त्यसमा पनि कटुवा पेस्तोलको प्रयोग बढी हुने गरेको छ । खुला सीमा र नेपाली सुरक्षाकर्मीको पातलो उपस्थितिले भारतबाट सहजै हतियार भित्रिने हुँदा त्यस्ता हतियार नै निर्वाचन सुरक्षामा बाधक बन्ने देखिएको छ ।

अनुमति लिएका हतियार जम्मा गराउन र भारतबाट अवैध हतियार भित्रिन नदिन कडाइ सुरु गरिएको प्रहरीले जनाएको छ । बाँकेका प्रहरी प्रमुख एसपी श्यामकृष्ण अधिकारीले लाइसेन्स भएका हतियार सबै जम्मा गराउन कडाइ सुरु गरिएको बताउनुभयो । उहाँले नाकाहरूबाट पनि कुनै अवैध हातहतियार र आपराधिक व्यक्तिको घुसपैठ रोक्न कडाइ अपनाइएको बताउनुभयो ।

यो खबर पढेर तपाईलाई कस्तो महसुस भयो ?
+1
0
+1
0
+1
0
+1
0
+1
0
+1
0
+1
0

Leave a Reply

Your email address will not be published. Required fields are marked *